سابق انسپکٹر جنرل پولیس پنجاب عامر ذوالفقار خان ایک بااصول، نڈر اور فرض شناس آفیسر
تحریر۔۔ محمد زاہد مجید انور
پاکستان پولیس سروس کے بے شمار افسران نے اپنی سروس کے دوران عوام کی خدمت اور قانون کی عملداری کے لیے گرانقدر خدمات انجام دی ہیں، مگر بعض شخصیات ایسی ہوتی ہیں جنہیں ان کی ایمانداری، پیشہ وارانہ مہارت، اور انسان دوستی کے باعث ہمیشہ یاد رکھا جاتا ہے۔ ایسی ہی ایک قابلِ قدر شخصیت سابق انسپکٹر جنرل پولیس پنجاب عامر ذوالفقار خان ہیں، جنہیں نہ صرف پولیس فورس بلکہ عوامی حلقوں میں بھی عزت و وقار کی نظر سے دیکھا جاتا ہے۔عامر ذوالفقار خان میرے والد مرحوم حاجی عبدالمجید انور (نمائندہ جنگ و جیونیوز، ٹوبہ ٹیک سنگھ) کے قریبی ساتھی تھے۔ 1999ء میں جب آپ کو ٹوبہ ٹیک سنگھ میں بطور سپرنٹنڈنٹ پولیس تعینات کیا گیا، تو آپ نے فوری طور پر علاقے میں امن و امان کے قیام کے لیے موثر اقدامات کیے۔ آپ کی تعیناتی کے دوران ایک نہایت افسوسناک واقعہ پیش آیا، جب معروف قانون دان ملک ابرار حسین نقوی ایڈووکیٹ کو قتل کر دیا گیا۔ اس سنگین کیس کو آپ نے انتہائی سنجیدگی اور ذمہ داری سے دیکھا اور اپنی ٹیم کے ہمراہ دن رات کی محنت سے قاتلوں کو گرفتار کیا۔ اس کامیاب کارروائی نے نہ صرف متاثرہ خاندان کو انصاف دلایا بلکہ عوام کے دلوں میں پولیس پر اعتماد بحال کیا۔عامر ذوالفقار خان کو ان کی دیانت، بے باکی، اور غیرسیاسی طرزِ عمل کی بدولت ہر سطح پر سراہا گیا۔ آپ کی شخصیت میں ایک بہترین کمانڈر کی جھلک نمایاں تھی، جو نہ صرف جرائم کے خلاف بھرپور کارروائی کرتا ہے بلکہ اپنے ماتحت افسران و جوانوں کو بھی مثالی قیادت فراہم کرتا ہے۔ انتہائی ملنسار اور نرم گو ہونے کے باوجود آپ نے قانون کی عملداری پر کبھی سمجھوتہ نہیں کیا۔آپ ایک مرتبہ آئی جی موٹروے پولیس بھی تعینات رہے، جہاں آپ نے روایتی انداز سے ہٹ کر کئی اصلاحات کی بنیاد رکھی۔ موٹروے پر نظم و ضبط، ٹریفک مینجمنٹ اور ڈرائیورز کی آگاہی مہمات میں نمایاں بہتری لائی گئی۔ عوامی شکایات کے ازالے اور سروس ڈیلیوری کو بہتر بنانے میں بھی آپ نے گراں قدر کردار ادا کیا۔جنرل پرویز مشرف کے دور میں جب ضلعی حکومتوں کا نظام متعارف کروایا گیا تو حکومتِ پنجاب نے آپ پر بھرپور اعتماد کا اظہار کرتے ہوئے ڈسٹرکٹ پولیس آفیسر (DPO) کا اہم منصب سونپا۔ اس نئے انتظامی سیٹ اپ کے تحت آپ نے پولیسنگ کے جدید اصولوں کو اپنایا اور عوامی رابطہ کاری کو ترجیح دی۔آپ کے کریئر کا ہر پہلو اس بات کی گواہی دیتا ہے کہ اگر نیت صاف ہو اور مقصد عوامی خدمت ہو تو کسی بھی ادارے کو مثالی بنایا جا سکتا ہے۔ آج بھی آپ کا نام سن کر اہلِ ٹوبہ ٹیک سنگھ فخر محسوس کرتے ہیں، کہ ان کے شہر میں ایک ایسا آفیسر تعینات رہا جس نے انصاف، دیانت اور بہادری کی نئی مثالیں قائم کیں۔عامر ذوالفقار خان نہ صرف پولیس فورس کے لیے بلکہ نئی نسل کے افسران کے لیے بھی ایک رول ماڈل کی حیثیت رکھتے ہیں۔ ملک کو آپ جیسے باکردار اور فرض شناس آفیسرز کی ہمیشہ ضرورت رہی ہے اور رہے گی۔
