عید میلادالنبیؐ عالم اسلام کیلئے سب سے بڑی خوشی کا دن ہے، چوہدری امیر علی
*ٹوبہ ٹیک سنگھ (محمد زاہد مجید انور سے)سابق چیئرمین رجانہ چوہدری نذیر احمد مرحوم،سابق چیئرمین رجانہ اور سابق ضلعی چیئرمین پنجاب فوڈ اتھارٹی اور معروف سیاسی وسماجی کاروباری شخصیت چوہدری شبیر احمد ننھا مرحوم کے چھوٹے بھائی رجانہ کی معروف سیاسی، سماجی و کاروباری شخصیت چوہدری امیر علی نے کہا ہے کہ عید میلادالنبیؐ عالم اسلام کے لیے سب سے بڑی خوشی اور مسرت کا دن ہے۔ نبی کریم حضرت محمد مصطفیٰ ﷺ کی ولادتِ باسعادت پوری انسانیت کے لیے اللہ تعالیٰ کی عظیم نعمت اور رحمت کا مظہر ہے۔ جشن میلادالنبیؐ عقیدت و احترام، محبت اور بھرپور جوش و خروش کے ساتھ منایا جائے گا۔اپنے ایک بیان میں چوہدری امیر علی نے کہا کہ حضور اکرم ﷺ کی آمد سے دنیا سے جہالت، ظلم، ناانصافی اور تاریکی کے خاتمے کی بنیاد رکھی گئی اور آپ ﷺ نے انسانیت کو امن، محبت، اخوت، مساوات، رواداری اور بھائی چارے کا درس دیا۔ آپ ﷺ کی سیرتِ طیبہ پوری انسانیت کے لیے بہترین نمونہ اور رہنمائی کا سرچشمہ ہے۔انہوں نے کہا کہ نبی کریم ﷺ کی ولادتِ باسعادت کا ذکر کرنا، آپ ﷺ سے محبت و عقیدت کا اظہار کرنا اور آپ ﷺ کی تعلیمات کو اپنی زندگیوں میں اپنانا ہمارے لیے باعثِ سعادت ہے۔ جشن میلادالنبیؐ کا حقیقی تقاضا یہ ہے کہ ہم محض ظاہری طور پر خوشی منانے تک محدود نہ رہیں بلکہ سیرتِ رسول اکرم ﷺ کے پیغام کو اپنی عملی زندگی کا حصہ بنائیں۔چوہدری امیر علی نے کہا کہ ہمیں چاہیے کہ عید میلادالنبیؐ کے موقع پر اپنے گھروں، محلوں، مساجد اور بازاروں کو سجانے کے ساتھ ساتھ غریب، مستحق اور ضرورت مند افراد کو بھی اپنی خوشیوں میں شریک کریں۔ محبتِ رسول ﷺ کا تقاضا ہے کہ ہم معاشرے میں امن، بھائی چارے، برداشت اور انسانیت کی خدمت کو فروغ دیں۔انہوں نے مزید کہا کہ آج امتِ مسلمہ کو درپیش مسائل کا حل بھی اسوۂ حسنہ پر عمل پیرا ہونے میں ہے۔ اگر ہم نبی کریم ﷺ کی تعلیمات، کردار، عدل، رحم، صدق و امانت اور حسنِ اخلاق کو اپنی زندگیوں میں نافذ کرلیں تو معاشرے میں حقیقی معنوں میں امن و خوشحالی اور بھائی چارہ قائم ہوسکتا ہے۔چوہدری امیر علی نے تمام اہلِ اسلام کو عید میلادالنبیؐ کی مبارکباد پیش کرتے ہوئے کہا کہ اس بابرکت موقع پر ملک و قوم کی سلامتی، ترقی، خوشحالی، امن و استحکام اور امتِ مسلمہ کے اتحاد کے لیے خصوصی دعائیں کی جائیں۔ اللہ تعالیٰ ہمیں سیرتِ طیبہ پر عمل کرنے اور محبتِ رسول ﷺ کو اپنی زندگی کا حقیقی شعار بنانے کی توفیق عطا فرمائے۔*
