ترقی پسند کسان رہنما چوہدری فتح محمد مرحوم —فخرِ والدین، فخرِ قوم
تحریر ۔محمد زاہد مجید انور
فادرز ڈے دنیا بھر میں اُن عظیم شخصیات کو یاد کرنے کا دن ہے جنہوں نے اپنی اولاد کے لیے سائبان بن کر زندگی کا ہر مشکل مرحلہ آسان بنایا۔ ایسے ہی ایک عظیم باپ، رہنما اور ترقی پسند شخصیت تھے چوہدری فتح محمد مرحوم—جو نہ صرف اپنے گھر کے ستون تھے بلکہ پورے کسان طبقے کے لیے ایک روشنی کا مینار تھے۔چوہدری فتح محمد مرحوم کا تعلق ایک باوقار، محنت کش اور بااصول کسان خاندان سے تھا۔ وہ کسان تحریک کے ان صفِ اول کے رہنماؤں میں شمار ہوتے ہیں جنہوں نے استحصالی نظام، جاگیردارانہ سوچ اور طبقاتی ناانصافی کے خلاف بھرپور آواز بلند کی۔ وہ علم، عمل، اخلاص اور قربانی کا پیکر تھے۔ ان کی جدوجہد کا ہر لمحہ اس بات کا گواہ ہے کہ وہ صرف اپنے خاندان ہی نہیں بلکہ اپنے طبقے کے ہر فرد کے لیے درد دل رکھتے تھے۔ان کے صاحبزادے سابق چیئرمین یونین کونسل چوہدری احمد نعیم فتح محمد آج بھی اپنے عظیم والد کی تعلیمات اور اصولوں کو لے کر عوام کی خدمت میں مصروفِ عمل ہیں۔ ان کی سیاست میں شرافت، عاجزی اور نظریاتی وابستگی انہی کی تربیت کا نتیجہ ہے۔چوہدری فتح محمد کی زندگی محض کسانوں کے حقوق کے لیے نعرے تک محدود نہ تھی، بلکہ انہوں نے میدانِ عمل میں رہ کر لوگوں کو منظم کیا، اُن میں شعور بیدار کیا اور انہیں اپنی زمین، محنت اور حق کا شعور دیا۔ اُن کی جدوجہد آج بھی ہمارے دلوں میں زندہ ہے۔آج، فادرز ڈے کے موقع پر ہم اُن کی عظیم قربانیوں کو سلام پیش کرتے ہیں۔ اُن کا مشن، اُن کے خواب، اُن کی تربیت، اور اُن کے اصول ہمیشہ ہمارے لیے مشعل راہ رہیں گے۔ ہم اللہ تعالیٰ سے دعا گو ہیں کہ وہ چوہدری فتح محمد مرحوم کو جنت الفردوس میں اعلیٰ مقام عطا فرمائے، ان کی قبر کو نور سے بھر دے، اور ان کی نسلوں کو اُن کے نقشِ قدم پر چلنے کی توفیق عطا فرمائے۔ آمین ثم آمین۔وہ باپ بھی تھے، رہنما بھی تھے، اور کسانوں کے دل کی دھڑکن بھی۔ آج وہ ہمارے ساتھ جسمانی طور پر نہیں، مگر ان کی سوچ اور قربانی ہمیشہ زندہ رہیں گی۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔منجانب ۔۔۔۔۔سابق چیئرمین یونین کونسل چوہدری احمد نعیم فتح محمد ٹوبہ ٹیک سنگھ
