حاجی ماجد محمود حئی: شہرِ ٹوبہ کا خادمِ قبرستان
تحریر
محمد زاہد مجید انور
ٹوبہ ٹیک سنگھ کی سماجی، سیاسی اور فلاحی تاریخ میں اگر کسی شخصیت کا نام نمایاں طور پر اُبھر کر سامنے آتا ہے تو وہ حاجی ماجد محمود حئی ہیں، جنہوں نے نہ صرف ایک کامیاب تاجر کی حیثیت سے اپنی شناخت بنائی بلکہ شہر کی فلاحی سرگرمیوں میں بھی نمایاں کردار ادا کیا۔سال 2022ء میں شہر کی مختلف سماجی و رفاہی انجمنوں کی مشاورت سے حاجی ماجد محمود حئی کو صدر مرکزی قبرستان جنازہ گاہ یونین منتخب کیا گیا۔ ان کے انتخاب کا باضابطہ نوٹیفکیشن اُس وقت کے میونسپل کمیٹی چیئرمین، میاں شہزاد احمد، نے جاری کیا۔ اُن کے انتخاب کو شہر بھر میں خوش آئند قرار دیا گیا کیونکہ اُن کی دیانتداری، خدمت کا جذبہ، اور سماجی خدمات پہلے ہی اہلِ شہر پر آشکار تھیں۔اپنے ساڑھے تین سالہ دورِ صدارت کے دوران، حاجی ماجد محمود حئی نے مرکزی قبرستان میں جو اقدامات کیے، وہ واقعی لائقِ تحسین اور قابلِ تقلید ہیں۔ صفائی و ستھرائی کے خصوصی انتظامات سے لے کر قبرستان میں بنیادی سہولیات کی فراہمی تک، ہر کام میں اُن کی ذاتی دلچسپی اور محنت شامل رہی۔ انہوں نے قبرستان میں پانی کی فراہمی، روشنی کا نظام، راستوں کی پختگی، اور سایہ دار درختوں کی شجرکاری جیسے منصوبوں پر عملدرآمد کروایا۔یہ کہنا بے جا نہ ہوگا کہ حاجی ماجد محمود حئی کے دور میں مرکزی قبرستان کی وہ حالت دیکھنے کو ملی جو ماضی میں ایک خواب کی مانند تھی۔ انہوں نے قبرستان کو صرف تدفین کی جگہ نہیں سمجھا، بلکہ اُسے ایک ایسی مقدس عبادت گاہ کی حیثیت دی جہاں صفائی، سکون، اور احترام ہر صورت قائم رکھا جائے۔ان کی یہ خدمات شہر کے ہر طبقے نے سراہیں، اور آج جب بھی مرکزی قبرستان کا ذکر ہوتا ہے، حاجی ماجد محمود حئی کا نام احترام سے لیا جاتا ہے۔ ان کا جذبہ، ان کی خدمت اور ان کی محنت آنے والے وقتوں میں اُن لوگوں کے لیے مشعلِ راہ ہوگی جو عوامی عہدوں کو صرف اعزاز نہیں بلکہ خدمت کا موقع سمجھتے ہیں۔حاجی ماجد محمود حئی کی خدمات اس بات کا ثبوت ہیں کہ اگر نیت نیک ہو اور دل میں خدمت کا جذبہ ہو تو کوئی بھی مقام ناقابلِ رسائی نہیں ہوتا۔ اُن کی قیادت میں مرکزی قبرستان کی جو ترقی ہوئی، وہ آنے والے وقتوں میں شہر کی فلاحی تاریخ کا روشن باب بن چکی ہے۔
