سیلاب زدگان کی خدمت میں پیش پیش۔۔۔اسسٹنٹ کمشنر کمالیہ اقراء ناصر
تحریر محمد زاہد مجید انور
*قدرتی آفات جب بھی نازل ہوتی ہیں تو انسانی زندگیوں کے ساتھ ساتھ ان کے روزگار اور خوشیوں کو بھی بہا لے جاتی ہیں۔ حالیہ بارشوں اور سیلاب نے بھی کمالیہ کے درجنوں خاندانوں کو بری طرح متاثر کیا۔ ایسے کڑے وقت میں عوام کو جس شے کی سب سے زیادہ ضرورت ہوتی ہے، وہ ہے ریاستی مشینری کا بروقت ساتھ دینا۔ خوش آئند بات یہ ہے کہ کمالیہ کی انتظامیہ، بالخصوص اسسٹنٹ کمشنر اقراء ناصر، سیلاب متاثرین کی داد رسی میں صفِ اول پر موجود ہیں۔اقراء ناصر نے متاثرہ علاقوں میں جا کر نہ صرف حالات کا جائزہ لیا بلکہ اپنے ہاتھوں سے سینکڑوں خاندانوں میں راشن بیگز تقسیم کیے۔ یہ عمل عوامی خدمت اور فرض شناسی کا منہ بولتا ثبوت ہے۔ ان کا کہنا ہے کہ مشکل کی اس گھڑی میں متاثرہ خاندانوں کو ہرگز تنہا نہیں چھوڑا جائے گا اور حکومت پنجاب کی ہدایت پر امدادی سرگرمیاں مسلسل جاری رہیں گی۔ ان کا عزم ہے کہ متاثرین کی بحالی تک یہ خدمت کا سفر رکے گا نہیں۔یہ امر بھی قابلِ ذکر ہے کہ اقراء ناصر کا شمار ان افسران میں ہوتا ہے جو ایمانداری، جرات اور دبنگ فیصلوں کے لیے جانے جاتے ہیں۔ وہ ایک فرض شناس خاتون آفیسر ہیں جو سماج میں خواتین کی محنت اور لگن کا روشن استعارہ ہیں۔ ہمارے معاشرے میں خواتین افسران اپنی ذمہ داریوں کو جس جانفشانی اور دیانتداری سے ادا کر رہی ہیں، وہ آنے والی نسلوں کے لیے ایک مثال ہے۔اس حوالے سے ڈپٹی کمشنر ٹوبہ ٹیک سنگھ محمد نعیم سندھو نے کہا کہ سیلاب متاثرین کی امداد حکومت پنجاب کی اولین ترجیح ہے۔ اسسٹنٹ کمشنر کمالیہ اقراء ناصر نے جس جذبے اور تندہی کے ساتھ کام کیا ہے وہ لائقِ تحسین ہے۔ انہوں نے مزید کہا کہ ضلعی انتظامیہ کے تمام افسران اور ٹیمیں متاثرین کے ساتھ کھڑی ہیں اور بحالی تک امدادی سرگرمیاں جاری رہیں گی۔کمالیہ کی عوام آج اس بات کی گواہی دے رہی ہے کہ جب آفت آئی تو انتظامیہ نے ان کا ساتھ دیا۔ اقراء ناصر کی کاوشیں نہ صرف متاثرین کے دکھوں کا مداوا کر رہی ہیں بلکہ سرکاری اداروں پر عوام کے اعتماد کو بھی مضبوط بنا رہی ہیں۔ بلاشبہ ایسے ہی فرض شناس اور عوام دوست افسران ہماری ریاست کے اصل سرمایہ ہیں۔*
