خدمتِ خلق کا عزم ولید عثمان کا نیا سفر
تحریر : محمد زاہد مجید انور
*ٹوبہ ٹیک سنگھ ہمیشہ سے ایک باشعور، صاف ستھرے اور ترقی کے خواہاں لوگوں کا شہر رہا ہے۔ یہاں کے شہری نہ صرف اپنے حقوق کے بارے میں حساس ہیں بلکہ فرض شناسی کے بھی قائل ہیں۔ ایسے شہر میں جب کوئی نیا منتظم آتا ہے تو عوام کی توقعات بھی قدرتی طور پر بڑھ جاتی ہیں۔حکومتِ پنجاب نے حال ہی میں ولید عثمان کو چیف آفیسر میونسپل کمیٹی ٹوبہ ٹیک سنگھ تعینات کرنے کے احکامات جاری کیے ہیں۔ ولید عثمان کا شمار اُن افسران میں ہوتا ہے جنہوں نے اپنے پیشہ ورانہ کیریئر میں کارکردگی، نظم و ضبط اور عوام دوستی کی مثالیں قائم کیں۔ وہ پنجاب کے مختلف شہروں میں بطور چیف آفیسر اپنی صلاحیتوں کا لوہا منوا چکے ہیں اور جہاں بھی تعینات رہے، وہاں شہری سہولیات کے معیار میں نمایاں بہتری دیکھنے میں آئی۔چارج سنبھالنے کے بعد انہوں نے اپنے دفتر میں ڈسٹرکٹ انجمنِ صحافیاں کے ضلعی صدر اور معروف کالم نگار کی حیثیت سے مجھ سے خصوصی گفتگو کی۔ گفتگو کے دوران اُن کے لہجے میں عزم اور جذبہ نمایاں تھا۔ ولید عثمان نے کہا کہ “عوامی مسائل کا فوری حل اور شہری سہولیات کی فراہمی میری اولین ترجیحات میں شامل ہیں۔ دفتری امور میں کسی قسم کی غفلت یا تاخیر برداشت نہیں کی جائے گی۔”انہوں نے واضح الفاظ میں کہا کہ عوام کے کام میں رکاوٹ پیدا کرنے والے عناصر کے خلاف سخت کارروائی کی جائے گی۔ اُن کے نزدیک شہری کے چہرے پر اطمینان کی مسکراہٹ ہی اصل کارکردگی کی پیمائش ہے۔ انہوں نے بتایا کہ وہ سائلین کی بات پوری توجہ سے سن کر اُن کے مسائل کے حل کے لیے عملی اقدامات کو یقینی بنائیں گے تاکہ شہریوں کو بار بار دفاتر کے چکر نہ لگانے پڑیں۔یہ عزم اور وژن اس بات کا مظہر ہے کہ میونسپل کمیٹی ٹوبہ ٹیک سنگھ ایک نئے سفر کا آغاز کرنے جا رہی ہے۔ صاف ستھرا ماحول، بہتر سڑکیں، موثر صفائی نظام، اور شہریوں کے لیے آسانیاں پیدا کرنا — یہی وہ اقدامات ہیں جو کسی بھی شہر کو حقیقی معنوں میں “مثالی شہر” بناتے ہیں۔اگر اس جذبے کو عملی شکل دے دی گئی تو یقیناً ٹوبہ ٹیک سنگھ انتظامی اعتبار سے بھی دیگر اضلاع کے لیے مثال بن سکتا ہے۔ ولید عثمان جیسے محنتی، ایماندار اور وژن رکھنے والے افسران سے عوام کی توقعات بجا طور پر بلند ہیں۔ اب دیکھنا یہ ہے کہ وہ کس طرح اپنے عزم کو عمل کے رنگ میں ڈھالتے ہیں۔خدمتِ خلق ایک مشکل مگر مقدس فریضہ ہے۔ اگر نیت صاف اور ارادہ مضبوط ہو تو راستے خود بخود آسان ہو جاتے ہیں۔ امید ہے کہ ولید عثمان اپنے اس نئے سفر میں شہریوں کے اعتماد پر پورا اتریں گے اور ٹوبہ ٹیک سنگھ کو واقعی ایک صاف ستھرا، خوشحال اور مثالی شہر بنانے میں کامیاب ہوں گے۔*
