دخترِ ہزارہ ماہم آصف ملک دیانت، قابلیت اور عوامی خدمت کی نئی مثال،ہزارہ وال قوم کے لیے باعثِ فخر
تحریر : محمد زاہد مجید انور
پاکستان کی سول بیوروکریسی میں باصلاحیت، فرض شناس اور عوام دوست افسران ہمیشہ ریاستی نظام کو مضبوط بنانے میں اہم کردار ادا کرتے ہیں۔ انہی قابل افسران میں ایک نمایاں نام محترمہ ماہم آصف ملک کا ہے، جنہیں حکومتِ پنجاب نے ضلع ٹوبہ ٹیک سنگھ کا نیا ڈپٹی کمشنر تعینات کیا ہے۔ ان کی تعیناتی نہ صرف ضلع ٹوبہ ٹیک سنگھ بلکہ ایبٹ آباد اور پورے ہزارہ ڈویژن کے عوام کے لیے باعثِ مسرت اور فخر ہے۔ مختلف سماجی، سیاسی، تعلیمی اور عوامی حلقوں نے اس تقرری کا خیرمقدم کرتے ہوئے اسے ہزارہ وال قوم کی بیٹی کی ایک بڑی کامیابی قرار دیا ہے۔محترمہ ماہم آصف ملک معروف قانون دان، ممتاز سماجی شخصیت مرحوم ایڈووکیٹ آصف ملک کی صاحبزادی ہیں۔ انہوں نے اپنی ابتدائی اور اعلیٰ تعلیم ایبٹ آباد کے مایہ ناز تعلیمی ادارے آرمی برن ہال کالج فار گرلز سے حاصل کی۔ طالب علمی کے زمانے سے ہی وہ اپنی ذہانت، محنت اور قائدانہ صلاحیتوں کے باعث نمایاں رہیں۔ بعد ازاں انہوں نے پاکستان کے انتہائی سخت اور مسابقتی سنٹرل سپیریئر سروسز (CSS) کے امتحان میں نمایاں کامیابی حاصل کرتے ہوئے خیبر پختونخوا سے اعلیٰ پوزیشن حاصل کی اور پاکستان ایڈمنسٹریٹو سروس (PAS) کا حصہ بن گئیں۔سرکاری خدمات کے دوران محترمہ ماہم آصف ملک نے مختلف اہم انتظامی ذمہ داریاں نہایت کامیابی سے نبھائیں۔ انہوں نے اسسٹنٹ کمشنر اوکاڑہ، اسسٹنٹ کمشنر نارووال اور اسسٹنٹ کمشنر راولپنڈی کے طور پر عوامی خدمت، انتظامی اصلاحات اور قانون کی عملداری کو یقینی بنانے کے لیے بھرپور کردار ادا کیا۔ بعد ازاں پنجاب ہوم ڈیپارٹمنٹ میں ایڈیشنل سیکرٹری (انٹرنل سکیورٹی) کے اہم منصب پر خدمات انجام دیتے ہوئے انہوں نے داخلی سلامتی، انتظامی معاملات اور پالیسی سازی میں اپنی پیشہ ورانہ صلاحیتوں کا کامیاب مظاہرہ کیا۔ان کی ایمانداری، شفاف طرزِ حکمرانی، مؤثر فیصلہ سازی، عوام دوست رویے اور بہترین انتظامی کارکردگی کو مدنظر رکھتے ہوئے حکومتِ پنجاب نے انہیں ضلع ٹوبہ ٹیک سنگھ جیسے اہم ضلع کی باگ ڈور سونپی ہے۔ توقع کی جا رہی ہے کہ وہ وزیراعلیٰ پنجاب مریم نواز شریف کے وژن کے مطابق عوامی خدمت، میرٹ، شفافیت، ترقیاتی منصوبوں کی بروقت تکمیل، شہری سہولیات کی بہتری، تعلیم، صحت، امن و امان اور ریونیو امور میں نمایاں بہتری لانے کے لیے اپنی تمام تر صلاحیتیں بروئے کار لائیں گی۔محترمہ ماہم آصف ملک نے عہدہ سنبھالتے ہی انتظامی امور میں دلچسپی لیتے ہوئے سرکاری اداروں کی کارکردگی کا جائزہ لینا شروع کر دیا ہے، جس سے عوام کو یہ امید پیدا ہوئی ہے کہ ضلع میں مؤثر گورننس، بروقت فیصلوں اور عوامی مسائل کے حل کی نئی روایت قائم ہوگی۔ ان کی پیشہ ورانہ سوچ، قانون کی بالادستی پر یقین اور عوام سے براہِ راست رابطے کا انداز انہیں ایک متحرک اور قابلِ اعتماد منتظم بناتا ہے۔ہزارہ وال قوم نے اپنی اس ہونہار بیٹی کی کامیابی کو اجتماعی اعزاز قرار دیتے ہوئے کہا ہے کہ ماہم آصف ملک آج نوجوان نسل، بالخصوص طالبات کے لیے ایک روشن مثال ہیں کہ مسلسل محنت، دیانت، تعلیم اور عزم کے ذریعے ملک کے اعلیٰ ترین انتظامی عہدوں تک پہنچا جا سکتا ہے۔ یہ کامیابی صرف ایک فرد کی نہیں بلکہ پورے معاشرے کے لیے حوصلہ افزا پیغام ہے۔عوامی، سماجی، سیاسی، صحافتی اور تعلیمی حلقوں نے محترمہ ماہم آصف ملک اور ان کے اہلِ خانہ کو دلی مبارکباد پیش کرتے ہوئے ان کے والد مرحوم ایڈووکیٹ آصف ملک کی خدمات کو بھی خراجِ عقیدت پیش کیا، جن کی بہترین تربیت اور رہنمائی نے قوم کو ایک باصلاحیت، فرض شناس، دیانت دار اور عوام دوست سول سرونٹ عطا کی۔بلاشبہ محترمہ ماہم آصف ملک کی تعیناتی ٹوبہ ٹیک سنگھ کے لیے ایک خوش آئند پیش رفت ہے۔ امید ہے کہ وہ اپنے وسیع انتظامی تجربے، اعلیٰ پیشہ ورانہ صلاحیتوں اور عوامی خدمت کے جذبے سے ضلع کو ترقی، شفافیت، خوشحالی اور بہترین انتظامی روایات کی نئی منزلوں تک پہنچانے میں اہم کردار ادا کریں گی۔اللہ تعالیٰ محترمہ ماہم آصف ملک کو اپنے فرائض منصبی احسن انداز میں انجام دینے، عدل و انصاف، دیانت اور خدمتِ خلق کے جذبے کے ساتھ ملک و قوم کی مزید خدمت کرنے کی توفیق عطا فرمائے اور انہیں ہر میدان میں کامیابی و کامرانی نصیب فرمائے۔ آمین۔
