انگلینڈ میں عمر فاروق گجر اور عرفان احمد گجر کی جانب سے حاجی عمران حمید کے اعزاز میں پُرتکلف عشائیہ، پاکستانی برادری کی ممتاز شخصیات کی شرکت
ٹوبہ ٹیک سنگھ(محمد زاہد مجید انور سے)انگلینڈ میں مقیم معروف سماجی و کاروباری شخصیات عمر فاروق گجر اور عرفان احمد گجر نے اپنی رہائش گاہ پر ٹوبہ ٹیک سنگھ کے مرکزی انجمن تاجران کے سرپرستِ اعلیٰ، معروف سیاسی، سماجی اور کاروباری شخصیت حاجی عمران حمید کے اعزاز میں ایک شاندار اور پُرتکلف عشائیے کا اہتمام کیا۔ تقریب خوشگوار، دوستانہ اور باوقار ماحول میں منعقد ہوئی جس میں انگلینڈ میں مقیم پاکستانی کمیونٹی، کاروباری شخصیات، سماجی رہنماؤں اور معزز مہمانوں نے شرکت کی۔اس موقع پر میزبانوں عمر فاروق گجر اور عرفان احمد گجر نے حاجی عمران حمید کو خوش آمدید کہتے ہوئے کہا کہ وطن سے آنے والی شخصیات کا استقبال اور ان کے اعزاز میں تقریبات کا انعقاد بیرونِ ملک مقیم پاکستانیوں کی اپنی مٹی، اپنے شہر اور اپنے لوگوں سے محبت کا عملی اظہار ہے۔ انہوں نے کہا کہ پاکستانی کمیونٹی جہاں بھی آباد ہے، وہ وطن عزیز کی عزت، وقار اور ترقی کے لیے اپنی ذمہ داریاں بھرپور انداز میں ادا کر رہی ہے۔اعزازی مہمان حاجی عمران حمید نے پرتپاک استقبال اور محبت بھرے جذبے پر میزبانوں کا شکریہ ادا کرتے ہوئے کہا کہ بیرونِ ملک مقیم پاکستانی ملک کی معیشت، سماجی ترقی اور قومی وقار میں انتہائی اہم کردار ادا کر رہے ہیں۔ انہوں نے کہا کہ ٹوبہ ٹیک سنگھ کی تاجر برادری اور عوام کی خدمت ان کی اولین ترجیح ہے اور وہ ہمیشہ عوامی فلاح، کاروباری ترقی اور باہمی اتحاد کے فروغ کے لیے اپنی کوششیں جاری رکھیں گے۔تقریب کے دوران پاکستان اور ٹوبہ ٹیک سنگھ کی موجودہ صورتحال، تجارت، سرمایہ کاری، سماجی خدمات، بیرونِ ملک پاکستانیوں کے کردار اور باہمی تعاون کے فروغ سمیت مختلف اہم امور پر تفصیلی تبادلۂ خیال کیا گیا۔ شرکاء نے اس عزم کا اظہار کیا کہ اوورسیز پاکستانی اپنے وطن اور آبائی علاقوں کی ترقی و خوشحالی کے لیے ہر ممکن کردار ادا کرتے رہیں گے۔تقریب کے اختتام پر پاکستان کی سلامتی، استحکام، ترقی، خوشحالی اور امتِ مسلمہ کے اتحاد کے لیے خصوصی دعا کی گئی، جبکہ مہمانوں کی پرتکلف ضیافت سے تواضع کی گئی۔ شرکاء نے میزبانوں کی مثالی مہمان نوازی کو سراہتے ہوئے اس تقریب کو محبت، اخوت، باہمی احترام اور اوورسیز پاکستانیوں کے وطن سے گہرے تعلق کا خوبصورت مظہر قرار دیا۔
