اسلام آباد وزیراعظم عمران خان کی زیر صدارت ملکی تشخص، تہذیب و ثقافت اور قومی ورثے کو اجاگر کرنے کے حوالے سے سینما انڈسٹری کا کردار اور سینما انڈسٹری کی بحالی کے حوالے سے اجلاس
اسلام آباد (سٹار نیوز ) اجلاس میں وزیرِ اطلاعات سینیٹر شبلی فراز، وزیر صنعت محمد حماد اظہر، معاون خصوصی لیفٹنٹ جنرل (ر) عاصم سلیم باجوہ، معاون خصوصی ڈاکٹر شہباز گل، معاون خصوصی سید ذوالفقار عباس بخاری، سینیٹر فیصل جاوید خان، متعلقہ وزارتوں کے سیکرٹری صاحبان، گورنر سٹیٹ بنک، چئیرمین ایف بی آر و دیگر سینئر افسران شریک
وزیر اعظم کو ملک میں سینما کی بحالی اور ملکی تشخص کو اجاگر کرنے کے حوالے سے سینما انڈسٹری کے اہم کردار کے حوالے سے تفصیلی بریفنگ
سینما انڈسٹری کو درپیش چیلنجز اور ان کو دور کرنے کے حوالے سے مجوزہ حکمت عملی پر غور
وزیرِ اعظم عمران خان نے اجلاس سے خطاب کرتے ہوئے کہا کہ وطن عزیز اور پاکستانی قوم کے منفرد تشخص کو اندرون اور عالمی سطح پر اجاگر کرنا، پاکستانیت کا فروغ اورنوجوان نسل کو قومی ورثے سے روشناس کرانا موجودہ حکومت کی اولین ترجیح ہے۔ عوام کو معیاری اور سستی تفریح کی فراہم کے ساتھ ساتھ سینما معاشرتی اقدار اور قومی تہذیب و تمدن کو اجاگر کرنے کے ضمن میں اہم کردار ادا کرتا ہے۔ وزیرِ اعظم نے کہا کہ ملک میں سینما انڈسٹری کی زبوں حالی کیوجہ سے نہ صرف غیر ملکی مواد کی بھرمار ہوئی ہے بلکہ اس سے نوجوان نسل کی اعلیٰ اقدار پرمبنی تربیت کی کوششیں بھی متاثر ہوئی ہیں لہذا اس حوالے سے ترجیحی بنیادوں پر کوششیں کرنے کی ضرورت ہے۔ وزیرِ اعظم نے سینما انڈسٹری کی بحالی اور مقامی سطح پر معیاری فلموں کی تیاری کے حوالے سے مراعاتی پیکیج دینے کی تجاویز کے حوالے سے تمام متعلقہ وزارتوں اور محکموں کو ہدایت کی کہ ان تجاویزپر عمل درآمد کا روڈ میپ جلد از جلد پیش کیا جائے۔
