جھنگ میں سیاسی کارنر میٹنگ؛ یعقوب شیخ کا موٹر وے منصوبے کے اعلان کا دعویٰ
جھنگ . سابق رکن صوبائی اسمبلی محمد یعقوب شیخ نے کہا ہے کہ اگر وہ آئندہ عام انتخابات میں کامیاب ہوئے تو جھنگ کو موٹر وے سے منسلک کر کے اسے سی پیک لنک روٹ کا حصہ بنایا جائے گا۔ وہ پروفیسر ڈاکٹر ملا خان حیدری کے ڈیرہ پر منعقدہ ایک سیاسی کارنر میٹنگ سے خطاب کر رہے تھے۔
کارنر میٹنگ میں سابق ایم پی اے راشدہ یعقوب شیخ سمیت مختلف سیاسی و سماجی شخصیات اور شہریوں نے شرکت کی۔ شرکاء کا استقبال کیا گیا اور تقریب کے آغاز میں مہمانوں پر پھول نچھاور کیے گئے۔
اپنے خطاب میں یعقوب شیخ نے کہا کہ وہ اور ان کا گروپ سیاسی طور پر فعال ہیں اور نئے انتخابی مرحلے میں بھرپور حصہ لیں گے۔ انہوں نے دعویٰ کیا کہ اپنے گزشتہ دورِ حکومت میں جھنگ میں متعدد ترقیاتی منصوبے مکمل کرائے، جن میں ڈسٹرکٹ ہسپتال کے غلام نبی بلاک کی تعمیر، یونیورسٹی آف جھنگ کے لیے فنڈز کی فراہمی، اسکولوں کی اپ گریڈیشن، خواتین کالجز کا قیام، کارپٹ روڈز اور سیوریج بحالی کے منصوبے شامل ہیں۔
انہوں نے آئندہ انتخابات میں قومی اسمبلی کی نشست پر الیکشن لڑنے کا بھی اعلان کیا۔
تقریب میں سابق ایم پی مہر سلطان سکندر بھروانہ، مسلم لیگ (ن) کے سابق ٹکٹ ہولڈر حاجی آزاد ناصر انصاری، ضلعی صدر شریف اختر انصاری، شیخ آفتاب احمد، حنان یعقوب شیخ سمیت دیگر سیاسی و کاروباری شخصیات اور شہریوں نے شرکت کی۔
