یادِ رفتگاں، ایصالِ ثواب کی پرنور محفل
تحریر وترتیب: محمد زاہد مجید انور
*زندگی اور موت انسان کے سفرِ زیست کے دو ایسے پڑاؤ ہیں جنہیں کوئی مٹا نہیں سکتا۔ دنیا فانی ہے، مگر نیک اعمال اور حسنِ سلوک انسان کو ہمیشہ زندہ رکھتے ہیں۔ گزشتہ دنوں ٹوبہ ٹیک سنگھ کی معروف سماجی و کاروباری شخصیت عرفان احمد (یوکے والے) کی اہلیہ لندن میں وفات پا گئیں۔ ان کے انتقال پر نہ صرف خاندان بلکہ علاقے بھر کی فضاء سوگوار ہو گئی۔مرحومہ کی روح کے ایصالِ ثواب کے لیے ایک پُرنور اور پروقار قرآن خوانی کی محفل ان کی اقامت گاہ کینال روڈ، مصطفیٰ آباد میں منعقد ہوئی، جہاں عقیدت و احترام کے ساتھ قرآنی آیات کی تلاوت سے فضا معطر ہو گئی۔اس موقع پر الفتح سیمنٹ اسٹور کے حاجی محمد اشرف، چوہدری محمد اعظم، اتحاد فارمیسی کے چوہدری محمد انور گجر، محمود علی، حاکم فارمیسی کے چوہدری مقصود قاسم، عمر فاروق (یوکے والے) سمیت معزز شخصیات نے شرکت کی۔ قرآن خوانی کی تقریب میں سابق ایم پی اے سردار مقصود خاں گادھی، وکلا برادری، تاجر رہنما، صحافیوں اور معاشرتی تنظیموں کے نمائندگان کی بڑی تعداد نے حاضری دی۔محفل میں روحانی سکون اور دعا کی کیفیت غالب رہی۔ شرکائے محفل نے مرحومہ کی مغفرت، بلندیٔ درجات اور لواحقین کے لیے صبرِ جمیل کی دعا کی۔ قرآن پاک کی تلاوت سے دلوں میں نرمی اور عجز کی کیفیت پیدا ہوئی، گویا ہر زبان یہی پکار رہی تھی کہ “انا للہ وانا الیہ راجعون”۔ایسی محافل نہ صرف مرحومین کے لیے ایصالِ ثواب کا ذریعہ بنتی ہیں بلکہ ہمیں بھی یہ احساس دلاتی ہیں کہ دنیا کی اصل حقیقت فانی ہے اور باقی رہ جانے والی چیز صرف نیک اعمال ہیں۔ عرفان احمد اور ان کے اہلِ خانہ نے صبر و استقامت کی جو مثال قائم کی، وہ قابلِ تحسین ہے۔اللہ تعالیٰ مرحومہ کو جنت الفردوس میں اعلیٰ مقام عطا فرمائے اور لواحقین کو یہ صدمہ برداشت کرنے کا حوصلہ دے۔ آمین۔*
