تجاوزات سے پاک پنجاب،نیا عزم، نیا سفر
تحریر ۔محمد زاہد مجید انور
*کسی بھی معاشرے کی خوبصورتی اور ترقی اس وقت تک ممکن نہیں جب تک وہاں نظم و ضبط اور انصاف قائم نہ ہو۔ پنجاب جیسے بڑے صوبے میں ناجائز تجاوزات کا مسئلہ برسوں سے جڑ پکڑتا جا رہا ہے۔ دکان داروں کی طرف سے سڑکوں پر قبضہ، ریڑھیوں اور ٹھیلوں کی بھرمار، پارکنگ کے غیر قانونی اڈے اور فٹ پاتھوں پر رکاوٹیں عوامی زندگی کو شدید متاثر کرتی ہیں۔ یہی وہ مسائل ہیں جنہوں نے شہری زندگی کو بے سکونی اور بے ترتیبی میں دھکیل رکھا ہے۔ڈویژنل انفورسمنٹ آفیسر پیرا فورس میڈم صدف ارشاد نے بالکل درست کہا کہ “ہمارا مقصد کسی کا رزق چھیننا نہیں، بلکہ قانون کے مطابق چار فٹ پیمائش پر عملدرآمد کروانا ہے۔” یہ جملہ اس بات کی وضاحت کرتا ہے کہ اصل ہدف عوامی سہولت ہے، نہ کہ چھوٹے کاروباری افراد کو نقصان پہنچانا۔ جب سڑکیں صاف ہوں گی، ٹریفک رواں دواں ہوگا اور فٹ پاتھ پیدل چلنے والوں کے لیے کھلے ہوں گے، تو اس کا فائدہ براہِ راست شہریوں کو ہوگا۔پیرا فورس کا یہ عزم “تجاوزات سے پاک پنجاب” صرف ایک مہم نہیں بلکہ ایک سوچ ہے۔ یہ سوچ اس حقیقت کو اجاگر کرتی ہے کہ معاشرتی ترقی صرف بڑے منصوبوں اور انفراسٹرکچر سے نہیں ہوتی بلکہ روزمرہ زندگی کی سہولتوں کو بہتر بنا کر بھی ممکن ہے۔ اگر ایک عام شہری محفوظ اور آسانی سے گزر سکتا ہے، تو یہی حقیقی ترقی ہے۔اہم بات یہ ہے کہ یہ کارروائیاں بلاامتیاز ہو رہی ہیں۔ ماضی میں ایسے آپریشن اکثر جانبداری یا دباؤ کی نظر ہو جاتے تھے، لیکن اب صورتحال مختلف ہے۔ قبضہ مافیا ہو یا بااثر شخصیات، پیرا فورس سب کو قانون کے کٹہرے میں لا رہی ہے۔ اس سے ایک نیا پیغام معاشرے میں پھیل رہا ہے کہ قانون سب کے لیے برابر ہے۔لیکن سوال یہ ہے کہ کیا صرف حکومت اور ادارے یہ کام کر کے مسئلہ ختم کر سکتے ہیں؟ یقیناً نہیں۔ جب تک عوام خود اس جدوجہد کا حصہ نہیں بنیں گے، تبدیلی دیرپا نہیں ہوگی۔ شہریوں کو یہ سوچ اپنانا ہوگی کہ فٹ پاتھ، سڑکیں اور عوامی جگہیں سب کی مشترکہ ملکیت ہیں۔ ان پر ناجائز قبضہ دراصل اپنے ہی ہمسایے کا حق مارنے کے مترادف ہے۔یہ بھی حقیقت ہے کہ تجاوزات صرف راستوں اور سڑکوں پر نہیں ہوتیں بلکہ ہمارے ذہنوں میں بھی جگہ بنا لیتی ہیں۔ جب ہم قانون کو نظر انداز کرتے ہیں، اپنی سہولت کو دوسروں کے حق پر ترجیح دیتے ہیں، تو ہم دراصل سماج کو بدنظمی اور ناانصافی کی طرف دھکیلتے ہیں۔ لہٰذا تجاوزات کے خلاف مہم دراصل ایک ذہنی اور معاشرتی اصلاحی مہم بھی ہے۔پیرا فورس کا نعرہ “تجاوزات سے پاک پنجاب کا عزم، پیرا فورس عوام کے ہم قدم” ایک امید دلاتا ہے۔ یہ امید ہے ایک ایسے پنجاب کی جہاں نہ صرف سڑکیں اور بازار صاف ہوں بلکہ سوچ اور رویے بھی قانون کے مطابق ہوں۔ یہی نیا سفر ہے جو ہمیں ایک بہتر، منظم اور خوبصورت مستقبل کی طرف لے جا سکتا ہے۔*
