یومِ آزادی؛ دفاعِ وطن، قومی یکجہتی اور پاکستان کی ترقی کا عہد
*ٹوبہ ٹیک سنگھ:(محمد زاہد مجید انور سے) پاکستان مسلم لیگ (ن) کے ضلعی رہنماء، چیف ڈائریکٹر النور ہاؤسنگ سوسائٹی اور شہر کی معروف سیاسی، سماجی و کاروباری شخصیت حاجی عبدالرزاق احمد ضیاء نے کہا ہے کہ یومِ آزادی ہمیں اپنے عظیم اسلاف کی قربانیوں کو یاد کرنے، وطن عزیز سے وفاداری کا عہد کرنے اور پاکستان کی سلامتی، استحکام و ترقی کے لیے عملی کردار ادا کرنے کا موقع فراہم کرتا ہے۔ آزادی ایک عظیم نعمت ہے اور اس نعمت کی حفاظت ہم سب کی مشترکہ ذمہ داری ہے۔انہوں نے کہا کہ پاکستان لاکھوں مسلمانوں کی جدوجہد، بے مثال قربانیوں اور قائداعظم محمد علی جناحؒ کی مدبرانہ قیادت کے نتیجے میں معرضِ وجود میں آیا۔ ہمارے بزرگوں نے آزادی کے حصول کے لیے اپنے گھر بار، کاروبار اور جائیدادیں چھوڑیں، بے شمار قربانیاں دیں اور ہجرت کی صعوبتیں برداشت کیں۔ آج ہم ایک آزاد ملک میں سانس لے رہے ہیں تو یہ انہی قربانیوں کا ثمر ہے، اس لیے ہمیں آزادی کی حقیقی قدر و قیمت کو سمجھنا ہوگاحاجی عبدالرزاق احمد ضیاء نے کہا کہ یومِ آزادی کے موقع پر ہمیں یہ عہد کرنا ہوگا کہ دفاعِ وطن، ملکی سلامتی اور قومی خودمختاری کے لیے ہم کسی قربانی سے دریغ نہیں کریں گے۔ پاکستان کی سرحدوں کی حفاظت کرنے والی مسلح افواج، پولیس، قانون نافذ کرنے والے اداروں اور دیگر سکیورٹی اداروں کے جوان ہمارا فخر ہیں، جنہوں نے وطن کے دفاع اور امن کے قیام کے لیے بے شمار قربانیاں دی ہیں۔ قوم اپنے شہداء اور غازیوں کو سلام پیش کرتی ہے اور ان کی قربانیوں کو ہمیشہ یاد رکھے گی۔انہوں نے کہا کہ آج پاکستان کو بیرونی خطرات کے ساتھ ساتھ اندرونی چیلنجز کا بھی سامنا ہے۔ معاشی استحکام، مہنگائی، بے روزگاری، تعلیم، صحت، امن و امان اور اداروں کی مضبوطی جیسے مسائل کے حل کے لیے قومی اتحاد اور اجتماعی سوچ کی ضرورت ہے۔ سیاسی اختلافات جمہوریت کا حصہ ہیں، لیکن ملکی سلامتی، آئین کی بالادستی، قومی مفاد اور پاکستان کی ترقی کے معاملات پر پوری قوم کو متحد ہونا چاہیے۔ان کا کہنا تھا کہ نوجوان پاکستان کا روشن مستقبل ہیں۔ اگر نوجوانوں کو معیاری تعلیم، جدید ٹیکنالوجی، ہنر اور روزگار کے مواقع فراہم کیے جائیں تو پاکستان دنیا کی ترقی یافتہ اقوام میں نمایاں مقام حاصل کرسکتا ہے۔ ہمیں نئی نسل میں حب الوطنی، دیانت داری، محنت، برداشت اور ذمہ داری کا شعور پیدا کرنا ہوگا تاکہ وہ ملک کی تعمیر و ترقی میں مؤثر کردار ادا کرسکے۔حاجی عبدالرزاق احمد ضیاء نے کہا کہ ملک کی ترقی صرف حکومت کی ذمہ داری نہیں بلکہ ہر شہری کو اپنی ذمہ داری پوری کرنا ہوگی۔ ہمیں قانون کی پاسداری، ٹیکس کی ادائیگی، صفائی کا خیال، عوامی املاک کا تحفظ، میرٹ کی حمایت اور اپنے فرائض ایمانداری سے ادا کرنے کو قومی فریضہ سمجھنا چاہیے۔ جب ہر فرد اپنے حصے کا کردار ادا کرے گا تو پاکستان مضبوط، خوشحال اور مستحکم ملک بنے گا۔انہوں نے مزید کہا کہ ہمیں قائداعظمؒ کے اصول اتحاد، ایمان اور نظم و ضبط کو اپنی عملی زندگی کا حصہ بنانا ہوگا۔ قومی یکجہتی ہی پاکستان کی سب سے بڑی طاقت ہے۔ لسانی، علاقائی، سیاسی اور دیگر اختلافات سے بالاتر ہوکر ہمیں پاکستانی ہونے کے رشتے کو مضبوط بنانا چاہیے۔حاجی عبدالرزاق احمد ضیاء نے یومِ آزادی کے موقع پر پوری قوم کو مبارکباد دیتے ہوئے کہا کہ دعا ہے اللہ تعالیٰ پاکستان کو ہمیشہ قائم و دائم رکھے، ملک کو امن، ترقی، خوشحالی اور استحکام عطا فرمائے، وطن عزیز کی سرحدوں کی حفاظت فرمائے اور پاکستان کے شہداء کے درجات بلند فرمائے۔ آئیے اس یومِ آزادی پر ہم سب مل کر عہد کریں کہ پاکستان کی سلامتی، خوشحالی اور ترقی کے لیے اپنی تمام تر صلاحیتیں بروئے کار لائیں گے اور وطن عزیز کو قائداعظمؒ کے خوابوں کی حقیقی تعبیر بنانے میں اپنا کردار ادا کریں گے۔*
